كلمات صغيرة في عينينا و سهله علي لسانا لكن خطيرة جدا جدا ..

[عطر الزهور]

يلا يا حبيب مامي خلص أكلك و انا اديك البونبوني ده

طيب خلص آخر قطمة من الساندويتش و انا افتح لك الكارتون

لو ذاكرت و جبت الدرجات النهائية هجيب لك البلاي ستيشن إللى انت عايزه

لو ما بطلتش زننننن و عياط هجيب لك البوبي

كفاية دوشة و جرى و صريخ و إلا هجيب لك البوليس

لو ما خلصتش الواجب مش هتروح النادى معانا و هنسيبك لوحدك

جمل بتتقال بمنتهي السهولة... بتطلع منا بشكل عفوى جدا ..بنفتكر كده اننا بنخليهم يعملوا إللى احنا عاوزينه و نخلص من وجع الدماغ و ننجز ..

طيب يا جماعه و ايه المشكلة في الكلام ده ...هيحصل لهم ايه يعني لما نقول لهم كده !!!

المفروض طول الرحلة في تربية أولادنا يكون عينينا علي ..
النتيجة بعيدة المدى اللي عايزين نلاقيها في شخصيتهم long term effect ..

أننا نكون حافز داخلي جواهم ...انهم يعملوا السلوك بدافع من جواهم مش عشان يحصلوا علي إشباع وقتي او خايفين من حاجة تحصل لهم ..

يعني ايه الكلام ده ؟


يعني مجموعة الجمل الأولي إللى الأم فيها عامله زى الملاك و عمالة توعد ابنها أو بنتها ب حاجة حلوة لو خلص اكله أو خروجه أو هدية أو لعبة لو انجز المهمة إللى وراه ..
هل تفتكروا الطفل ده لما يكون عنده 25 سنة مثلا هيكون بيعمل كل حاجة كده لله!!!
هيكون عنده حافز داخلي للانجاز و الالتزام ؟؟؟

لا طبعا هيتعود ان كل شئ ب مقابل ..كل حاجة لازم رشوة

رشوة!!

اه رشوة ...


مش انت معوداه كل ما يجي يعمل حاجة ياخد مقابل ...هي دى مش رشوة يا حبيبتى !!

هيبقي طماع ..
هيبقي عايز المزيد و مفيش حاجة هتملي عينه..
مش هيبقي عنده دافع أنه يحقق نفسه ...
هو كل عينه علي المقابل الوقتي ..
حاجة في ايده حالا ياخدها ...
مش هيكون عنده صبر علي أنه يحقق هدف بعيد ..
هيبقي شخص متسرع عايز يشوف نتيجته قدام عينه النهاردة قبل بكرة ..

طيب نيجي لمجموعة الجمل التانية إللى الأم فيها عماله تهدد ابنها ..هجيب لك البوبي ..مفيش خروج ...هنسيبك و نخرج ...هجيب لك البوليس ..
الطفل ده بعد 20 سنة هيكون شخصيته عامله ازاى؟ هل هيكون عنده دافع داخلي للشغل؟؟ هل هيكون إنسان ملتزم ل ذاته كده!!!

لا طبعا
هتلاقيه مش هيشتغل غير لما يكون تحت كورباج .. غير لما حد يهدده ..
هيبقي إنسان مهزوز مفيش ثقة في نفسه ..
هو علي طول خايف و هو صغير و هو كبير ..
و ممكن شوية و يكون عنده لا مبالاة ..مش هيهمه كلامك و لا تهديدك ..

كلمات صغيرة في عينينا و سهله علي لسانا لكن خطيرة جدا جدا ..

بالاضافه ان قيمة الحاجة إللى بتتحط في المقارنة دى بتقل قيمتها .. مثلا ( احفظ القرآن إللى وراك عشان اديك الشيكولاته دى) المقارنة دى تخلي قيمة القرآن تقل في نظر الطفل .. كذلك المذاكرة .. كذلك الأكل ..اى حاجة بتدخل في العلاقة الشرطية دى ...

بلاش ارجوكم أبدا نربط كل سلوك ب حاجة حلوة كانت أو وحشة ..

طيب الحل ايه ؟

1- محتاجين نقدم اختيارات محددة للطفل limited choices و مقبولة بالنسبة لنا
مثلا يكون وراكم تمرين و الطفل مش جعان اوى ( تحب تاكل دلوقتي و لا لما ترجع يا حبيبي؟)
مثلا بنتك راجعة من المدرسة ( تحبى تريحى شوية يا حبيبتي و لا نبدأ مذاكرة)
الطفل هنا هيفتكر انه هو صاحب القرار و ده هيخليه مبسوط و.ملتزم بالحاجة إللى اخترها ..

2- الاتفاقات المسبقة إللى انتم حطينها مع بعض اهم حاجة يكون هو مشارك فيها عشان يحس ان له دور في القرار إللى واخدينه و أنه مش مجرد بينفذ فقط .. بالعكس هيجي انه بيختار اللى يريحه هو ..
مثلا انتم عاملين جدول مع بعض المذاكرة و معلقينه .لاقيتيه طول في فترة الراحة ..تقولي له حبيبي ممكن تراجع الجدول إللى ورانا عشان نعرف عندنا ايه ..

3- Ask Don't Tell..
بدل ما تقولي لها بطلي تنطيط ..قولي لها ممكن نلعب براحة؟
بدل ما تقولي بطل زن يا بني ..قولي له ممكن نتكلم بهدوء ؟

4- تشتيت الانتباه .. ابنك مش عايز ياكل ...اشغلي انتباهه ب اى حاجة كده حواليكم و اكليه
ماشيين في الشارع و بنتك عمالة تصرخ و تعيط بدل ما تقولي لها اسكتي و إلا هجيب عمو الوحش ياخدك شتتي انتباها قولي لها بصي العربية لونها ايه ... ايه ده البنوتة دى لابسة ايه...

[زهرة البنفسج]

تسلم ايدك حبيبتي

[عطر الزهور]

[سارة أحمد]

مشكورة على مواضيعكِ الأكثر من رائعة والمميزة.. وسلمت الأنامل الذهبية
دمتي متألقة مبدعة متميزة


بانتظار جديدكِ المميز
ودي واحترامي لشخصكِ الرائع