هاه عايزة ايه اعترفي ؟!

[الجنة غايتي]

والدي رحمة الله عليه كان بيحبنا جداً جداً لكنه مكانش بيعرف يجي يقول لواحدة فينا ( بحبك ) ، ولما كنت أجري عليه واقوله أنا بحبك أوي يا بابا كان بيقولي :
( هاه عايزة ايه اعترفي ؟! )
كان فاكر إني بمهد علشان أطلب منه حاجة ، لكني في الحقيقة كنت ببقي عايزة اقوله بحبك وبس مش حاجة تاني !!
في أعياد ميلادنا كان يدينا فلوس علشان نروح نشتري الي ع ذوقنا ، في مرة قعدت أعيط وأقوله :
( نفسي تجبلي هدية حلوة مش تديني فلوس !!)
وبالفعل الراجل راح مشكوراً جابلي چاكت لونه غريب واستايله أغرب ومايتلبسش 🤣🤣..

ولما شفت الچاكت ده اتصدمت ، لقيته ياعيني بيقولي :
( مش قلتلك خدي فلوس هاتي الي ع ذوقك أنا ما بفهمش في حاجات البنات والله )..
ووقتها أدركت أول معني لفكرة ( القدرات )..

إن كل انسان مننا عنده ( قدرات ) مختلفة عن الأخر ، ومش لازم نكون كلنا عندنا نفس القدرات علشان نرتاح مع بعض ، الصح إننا نحترم قدرات بعض ونقدر تعبنا لبعض ..
فيه حد ممكن يكون بيحبك أوي بس مابيعرفش يعبر بالكلام لكن كل أفعاله تثبت ده ، ماينفعش نتهمه بالتقصير أو عدم الحب ، هو قدراته كدة مابيعرفش يعبر !!
وفيه حد تاني بيعبر كويس وبيعافر علشان يقدم حاجة لكن أيده مش طايله ، قدراته كدة بس بيحاول!!
طول ما الي قدامك بيقدم ( قدراته ) وبيحاول مايستخسرش فيك القدرات ديه لازم تقبل عطاءة حتي لو كان مش ع مزاجكك ..

اتخلقنا مختلفين:
فيه مننا الي بيعرف يقدم دعم مادي ، وفيه الي بيعرف يقدم دعم معنوي ، وغيره يقدم دعم نفسي ، والي يقدم ليك وقته ، والي يقدم ليك عقله وأفكاره والي يقدم مادة فقط دون أي مشاعر أخري
كل واحدة عنده ( قدرة ) ما ، هي ديه قدراته وهو ده آخرها ، دورنا بقي إننا نقدر العطاء ده ونشكر الطرف الأخر عليه علشان ما نكدرش ع نفسنا الحياه ولا غيرنا ...
نهاركم تقدير للعطايا 🤗