تعالى حعلمك شوية افكار للتوفير

**sandy22** · رقم المشاركة : ( 1 ) 02-08-2016

ازيكم يا بنات عاملين اية يا رب الكل يكون بخير بصراحة انا حبيت المنتدى هنا جدا وحاسة انة حيكون بيتى التانى بامر الله
بصو يا قمرات انا من النوع الى مبيعرفش يعمل ميزانية ويمشي عليها مفيش مرة عملتها وميشت بالمظبوط لازم كانت تطلعلى حاجة تبوظلى الدنيا بس انا يا بنات بصراحة عندى حبة افكار بستخدمها وبتوفرلي كتير فقلت اقولكم عليها يمكن اقدر افيد بيها حد
من غير رغى انا مش حقولك اعملى ميزانية كذة وكذة لا كل بيت ظروفة تختلف عن التانى وموضوع الميزانية اوقات كتير بيفشل لان بيجي اول الشهر نملى التلاجة ونبدا من اول عشر ايام فى الشهر نلاقي المصروف بدا يخلص خصوصا لو جات حاجة على غفلة مكناش متوقعينها
بس انا حقولك على شوية افكار تساعدك على التوفير طيب زى اية يا بنات حنعرف مع بعض

(1) توفير ثمن البريل
_ يعنى البنات الى بتشترى بريل قزايز زى الفيرى والفيبا افضل توفر تمنة وتعملة فى البيت او تشترى سايب اوفر لكن الى مش حابة تغير ممكن اقولها فكرة تانية تقسمى مثلا قزازة البريل لى 3 قزايز وتحطى على كل قزازة معلقة ملح وترجيها كويس بعدها تزوديها مية وتسيبيها للاستخدام الملح حيتقلها ومش حيبقي خفيف وكمان القزازة كدة حتعيش معاكى فترة اكبر
انا عن نفسي بعمل البريل بيكلفنى 15 جنية بس وبيعملى اكتر من 15 كيلو الاول كان بيعملى 12 بقيت اسيبة اربع ساعات وارجع اقلب وازود مية و معلقتين ملح كبار بقا يعملى 15 كيلو ولو عايزنى انزلكم الطريقة حبايبي عيونى ليكم

(2) جيبي مسحوق الغسيل الى بتحبية اريل اوكسي تايد انا عن نفسي بحب التايد لانة اوفر واحسن فى الغسيل وريحتة تحفة كمان المهم تجيبي الكيلو وتجيبي علية كيلو سايب وتخلطيهم مع بعض وتحطيهم فى جردل صغنون او حتى كيس وتسيبي جواة كوباية بلاستيك وتسيبية للاستخدام
محدش يقلق ويقول مش حينضف لا حينضف وتلاقي الغسيل زى الفل كمان

(3) تخزين الخضار شوفي اية رخيص فى السوق ولو بتجيبي مثلا نص كيلو للطبخة هاتى كيلو استخدمى وخزنى الباقي فى الفريزل وورقة على الحاجة مكتوب فيها تاريخ التخزين وسيبية للاستخدام صدقينى اوفر واسهل كمان اوقات بنلاقي نفسنا مش قادرين ننزل السوق التخزين بيريحنا فى الاوقات دة يا بنات اما نيجي نخزن يفضل نخزن في اطباق فوم ونكتب على الطبق فية اية والتاريخ بيكون منظهم واسهل الكياس بتبهدل الدنيا وبتاخد وقت في التدوير على الحاجة يستحسن نسبها بس للصلصة

(4) تخزين الطماطم يا بنات ضرورى معظم طبيخنا بيها شوفي وقت ما ترخص وكل ما تنزلى هاتى شوية واعمليهم صلصة وفى اكياس كل كيس قد الطبخة وعلى الفريزر

(5) تخزين الفاكهة برضو شوفي الفاكهة اوانها والارخص فيها وخزنى في الفريزر وفية فواكة كتير البعض بيفتكر انها مبتتخزنش ممكن تتخزن زى الاناناس الى هو الكنتلوب بيتنضف ويتقطع مكعبات وعلى الفريزر وكمان البرتقال في العصارة يتعصر خام وفي اكياس وفي الفريزر واما نيجي نستعملة نعملة الجزر وسكر وفي الخلاط كانة طازة بالضبط وغيرة كتير

(6) محاولة الاستغناء عن الجاهز بمعنى حاولى قد ما تقدرى تعملى حاجتك في البيت ارخص وانضف كمان زى عجينة البيتزا الاقراص الفينو الجبنة النستو الكوبايات الانشون وغيرة كتير

(7) اعملى صابونة الغسيل بدل ما تشتريها وادعكى بيها الالمونيوم الرخام والسلستيل خامتها مش حتكلفك 10 جنية وحتعملك 24 صابونة كبيرة لو حابة تعمليها عرفينى وانا عنيا ليكي حقلك الطريقة بالتفصيل ولو قدرت حنزلهالكم بالصور كمان

(8) التدوير يا بنات بجد فن جميل وحتخرجى حاجات مفيدة من حاجات حتروح الزبالة شوفي عندك اية ودورى في النت عن فن التدوير صدقينى مش حتحتاجى ترمى اى حاجة بعدها

(9) التوفير في البس وخاصة للامهات بنات بنشترى لبس وخلاص اوقات تيجي مناسبة نكلفها لبس جديد وهية لبسة و يتركن جمب اخواتة واحنا كامهات ننزل نشترى لبس لاولادنا اوقات يزيد عن الزوم لدرجة الطفل يكبر وتكون لسة فية هدوم بكيسها زى ما هية فياريت نشترى قد احتياجنا وبس

(10) بلاش التهدير نحاول ناخد حاجتنا بتنظيم بلاش السربعة والكسل براحة وتنظيم اعرف ناس والله اما تيجي تستخدم الحاجة تستخدمها بسربعة وتلاقي منها كتير بيتهدر على الفاضي وبدون حاجة

(11) التخزين الزيادة بلاش اول ما نمسك المرتب ننزل نشترى اى حاجة رخيصة لمجرد عليها عرض اوقات بتفضل لحد ما صلاحيتها تنتهى وتترمى

(12) الحلويات يا بنات بلاش نفضل نشترى لاولادنا حلويات على الفاضي والمليان انتى كدة مش بتفرحيهم بالعكس بتضريهم صدقينى الطفل بيفرح بالحاجة الى بتعملهالة امة اكتر بس غيرى في اسلوب التقديم مثال الشيبسي اعملية في البيت وهاتى نكهة من العطار ورشي علية وطبق مرسوم وجمبها كوباية عصير حيفرح بيها اكتر من الجاهز وحيكون دايما مستنى ماما حتعملى اية التهاردة
البن الى علية طعم دلوقت فية نكهات كوباية لبن وحطى نكهه وشفاطة او قزازة لو رايح الحضانة حيعجبة اكتر
لو بيحبو الجيلى كولا هاتى كيس جيلى بالطعم الى بيحبة وحطى علية معلقة كبيرة جيلاتين بودة ومعلقة سكر ونص كباية مية وقلبيهم كويس لحد ما يدوبو وارفعيهم على النار دقيقتين وبعدها هاتى القوالب السيلكون الاشكال وادهنيها زيت خفيف وصبي وفى التلاجة لمدة ساعة حيبقي عندك احلى جيلى كولا وهكذا

(13) خزنى توم وبصل اما يكون رخيص التوم بيرخص ويوصل لا اتنين جنية خزنى وعلقي ومحدش يخاف انة ينشف اما تحسى انة حينشف قشرية وافرمية وفى طبق فوم ولفية فى ورقة فويل وفى كيس داخل كيس وعلى الفريزر مش حتلاقي اى ريحة فى التلاجة واما تحتاجى تاخد معلقة معلقة قد الطبخة

(14) احنااا دائما نجيب الليمون ونسيبه فى الثلاجه وونبص نلاقيه بااااظ يستحسن نلف اليمون كل وحده بورقه كده عمرهااا يطول معاكى

(15) وفري ثمن الفيجيتار واعملية من بواقي العيش البلدى مش الفينو لانة بيكون احلى هو ينفع بالفينو عادى برضو
هتحمصي العيش فى الفرن وبعدين اطحنيهم كويس وتجيبى عليهم بجنية بصل بودر وبجنية توم بودروتقلبى عليهم اى توابل عندك بتحبيها
وبكدا هتكونى عملتى احلى فيجيتاركمية كبيرة ورخيصة كمان هنعمل بيهم احلى بانية وبفتيك وكفتة البطاطس وجاحات تانية كتيييييييييييييييير

(16) ممكن نستفيد من بواقى الاسماك المقلى او المشوى مفيش فرق خالص وتعمليهم زى التونة تقطعى عليهم بصل وطماطم وفلفل الوانوتعصري عليهم ليمونوبيكون طعمهم جميل

(17) اعملى اكلات من بواقي اكلات مثلا زى الارز اما بيبات كتير مبيحبش ياكلة نجيب باقي الارز ممكن تحطى علية بيضة وتكورية وتحشية زى الكوبيبة جبنة او زيتون وتقلية فى الزيت
او ممكن تعملية كفتة رز عبارة عن بصله وخضرة وتومة وبهارات وكلهم فى الكبه مع الرز وتصبعي وتحمريهم زى الكفته طعمها حلو جدا
او ممكن تعملية صينية بشميل تقلبى الارز مع شويااا لحم مفروم ورصيه فى صنيه وحطى بشاميل والف هنا وهكذا

(18) وفري ثمن المنظفات واعمليها فى البيت بجد بتكلف كتير وبتكون العبوات صغيرة حقولك زى اية زى الجلانس مثلا ربع كباية خل ومعلقة فيرى صغيرة وكملى البخاخة مية بقا عندك احلى جلانس قزاز
او ملمع الخشب زى الجلانس برضو بس بتزودى علية ربع كباية زيت زيتون طبيعيى او زيت اكل عادى بس زيت الزيتون افضل وحبة معطر واتفرجى على لمعان الخشب ونضافتة ورحيتة كمان
تركيبة للحاجات الشديدة زى الرخام والسيراميك والالمونيوم الى مسودة وغيرهم ولا السلستيل والسيراميك يا سلام بتخلية بيبرق بتجيبي ملح لمون وخل وفيرى ومعلقة كربونات وتحطيهم فى قزازة وترجى وتسيبيهم للاستخدام

دة شوية افكار كانت عندى قلت افدكم بيها يا بنات امانة عليكم الى استفادت تدعيلى دعوة بظهر الغيب ليا ولبناتى ولزوجى مش طالبة منكم اكتر من الدعاء
فى امان الله