منتدي حلاوتهم

منتدي حلاوتهم (https://7lwthom.net/vb/index.php)
-   مواضيع عامة (https://7lwthom.net/vb/forumdisplay.php?f=4)
-   -   عيب ده وقت راحة ماتزعجيش الناس (https://7lwthom.net/vb/showthread.php?t=64837)

الجنة غايتي 01-10-2021 07:30 PM

عيب ده وقت راحة ماتزعجيش الناس
 



https://up.7lwthom.net/do.php?imgf=163310934393631.jpg

كان زمان لما التليفون يرن وقت العصاري أو بعد ١٠ بالليل كانت ماما تجري عليه مفزوعه وهي عمالة تقول :

( خير اللهم اجعله خير )
وكأن الإتصال في الوقت ده يحمل خبر مش كويس أو فيه حاجة حصلت..

ولما كانت تدخل تنام الضهر هي وبابا وإخواتي وأنا أفضل كعادتي صاحيه كانت تأكد وتحرج عليا إن ممنوع منعاً باتاً إني أتصل بأي حد في التوقيت ده وكانت تقولي :

( عيب ده وقت راحة ماتزعجيش الناس )
كان فيه وقت للإتصال وكنا لازم نحترم راحة بعض ووقت بعض .
دلوقتي الواحد يلاقي التليفون بيرن في أي وقت ومكالمات أي وقت ولو مردتش تكون فيه مطاردة ع الماسينجر والواتس اب مستنياك وكأنك عامل جريمة ولا عليك دين !!
وكله كوم والإتصال بعد ١٢ بالليل ده كوم تاني وكأنه طبيعي إن حد يتصل بحد في الوقت ده ولو مردتش تلاقي إعادة إتصال مرة واثنين وثلاثة والي هو هاترد ياعني هاترد !!
إيه الي حصلنا ؟!
إيه كمية قلة الذوق الي بقينا فيها مع بعض ؟!
الطبيعي إن التكنولوجيا والتطور يخلينا أكثر حضارة وأكثر تطوراً ، لكن الي بيحصل إننا عمالين نفقد من قيمنا وعاداتنا الطيبة وإحترامنا لحدود بعض ..
كنا زمان لا نملك كل وسائل التواصل ديه بس كنا علي تواصل جاد علي أرض الواقع ، النهاردة عندنا كل وسائل التواصل وعايشين أغراب ، كنا بنبعت لبعض جوابات و تلغرافات ونستني التليفون يرن ترنك علشان نعرف إن غالي علينا بعيد بيتكلم ..
ليه ضعنا وسط الزحمة وضيعنا كل حلو كان عندنا ،كان ممكن نتطور ونتقدم بس وإحنا محافظين علي عادات طيبة وقيم عُليا أترسخت فينا ، بس تطورنا ورمينا كل حلو مع التطور وسبناه ومشينا ...
الحل دلوقتي إننا نرجع ندور وسط الكراكيب علي قيمنا الطيبة ، علي الخُلق الأصيل الي عايش جوانا بس مع الزحمة نسيناه .

نرجع تاني نعلم ولادنا الأصول والواجب والقيم مع الحرام والحلال..
الحل دلوقتي إننا نعلم الي باقي وكل واحد يبدأ بنفسه ، لو ده حصل هانلاقي طريق نجمع بيه بين الحُسنين
بين التطور ..... وبين هويتنا ..
نهاركم رجوع للأصول ..


الساعة الآن 04:39 PM.

Powered by vBulletin® Version 3.8.11
Copyright ©2000 - 2022, vBulletin Solutions Inc.
User Alert System provided by Advanced User Tagging (Lite) - vBulletin Mods & Addons Copyright © 2022 DragonByte Technologies Ltd.