الطفل

عارف ياعنى إيه ماما ؟!!!

عارف ياعنى إيه ماما ؟!!!

ياعني أول ما بتعرفي إنك حامل أول حاجة لازم تدربي نفسك عليها إن حياتك خلاص مابقتش ملكك ، بقت ملك كائن صغير مش فاهم أي حاجة في الحياه غير إنك الكون بالنسبه اليه..هايعمل كل مصيبة والثانية وهايلاقيكي بتصرخي وهو هايقف يبصلك بكل براءة مش إستعباط لأ هو فعلاً مش فاهم ..هاتمشي تشتكي من شقاوتهم وتنطيطهم بس أول ما يتعبوا ويترموا ع السرير مهدودين وعنيهم مدمعة من السخونية والبرد هاتلاقي قلبك وقع في رجليكي لوحده ..هاتبقي مش عارفه تعملي إيه لما ينام ، تجري تخلصي الي وراكي ولا تنامي شويه تلحقي ترتاحي ، مش هاتبقي عارفة فعلاً لأنك من كتر التعب مابتبقيش عارفة تفكري ..لما بقيتي ماما حياتك فعلاً بتقف ، بتقف تماماً علي الأقل سنتين لحد ما الكائن الصغير ده يبتدى يفهم شويه ياعني إيه حياه ويدرك أنه خرج من رحمك ل رحم أكبر أنتي برضه الي محتوياه ..مدام قررتي تتجوزى لازم وانتي بتمضي ع القسيمة تمضى علي إقرار إن حياتك بتختلف تماماً ، بتختلف وانتي بتوهبي حياتك عن طيب خاطر لكائن صغير ماسك في رقبتك ومايعرفش في الكون غيرك ، حتي والده مايعرفوش زيك أنتي الحياه والكون وكل حاجة بالنسباله ، علشان كدة لما تلاقوا ام جديدة اقفوا جنبها بكل طاقتكم لأنها مابتبقاش مستوعبة التحول الي حصل في حياتها مش مستوعبة إنها فجأة لا عارفه تنام ولا تأكل ولا تشرب ولا حتي تستحمي ، وياريت الكلام الرومانسي المثالي بتاع الأمومة ده تفهموا إنه اه جميل ورائع وحلو بس شئ طبيعي إن الأم بيجي عليها وقت بتتعب وتقع وتكتئب وده مش معناه إنها كارهه دورها أو كارهه ولادها ، كل ما في الأمر إنها تعبت ومحتاجة ايد تطبطب عليها وتساعدها تعدي أول سنتين أمومة دول لحد ما توقف طفلها ع رجليه ..ساعدوا الأمهات واقفوا جنبهم لأنهم فعلاً بيصارعوا الحياه من أجل إنهم يوهبوا لطفلهم الحياه…فا رفقاً بهم .

ايمان

اللهم ارزقنا حبك وحب من يحبك وحب كل عمل يقربنا الي حبك واجعل سعادتنا في مناجاتك وأنعم علينا بمحبتك ورضاك في الدارين

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى